《時代》
今個月兩個星期內破紀錄接咗大約60個Career Coaching。記得啱啱開始做Career Coaching嘅時候我對自己好冇信心，不停問過嚟同我見面嘅求職者，「其實Career Coaching有冇得做？」依家睇返原來真係有得做，因為好多人都唔知道點樣將自己個履歷表寫好、點樣去準備面試、點樣去面試、面試之後要做啲咩、出Offer嘅時候要點樣去傾......甚至乎唔知道自己嘅職業生涯道路應該點樣行。
我係一個比較老派嘅人，2011年入行，已經唔記得見過幾多個Candidate、讀過幾多CV。其實由去年開始不斷有人叫我不如試吓將自己嘅品牌推出去做Webminar、拍片、甚至將自己嘅教學內容大眾化，收被動收入。我一一拒絕。其實賺錢好容易，同幾個志同道合嘅夥伴組成一個聯盟，上網教學；將自己嘅書變成做電子書；又或者將自己教學內容擺上網俾人下載，賺取被動收入；甚至乎大幅減價，咁樣你哋購買嘅並唔係價值而係價錢。最近LinkedIn多咗好多行家都有出嚟做Career Coaching，但係細心留意我由始至終都沒有喺LinkedIn宣傳，至少短期內都唔會，我想只係做香港人生意，穩打穩扎一步一腳印。
如果有得俾我揀，如果唔係因為疫情，我第一個想取消嘅服務就係做Google Hangouts Career Coaching，老派嘅我覺得Career Coaching一對一面對面先係王道。我想面對面教你、觀察你、注意每一個細節位有冇可以改善的地方，雖然而家科技發達好多面試都係透過電腦或者電話去完成，但係大部份嘅面試都係注重人與人嘅溝通，試想想：如果硬性技能一樣的話，點樣可以將你同其他求職者分別？就係軟技能。以前成日有一個想法就係，點解大學生付出咁多錢去補習入大學，但係入完大學之後反而忽略咗自己搵工呢？點解冇一間補習社係教人搵工、面對職場上嘅困難？
而家係一個困難的時代，但係，就好似近代歷史上每一個艱難時刻，捱過去就會成為新局面嘅開創者、新時代主人。
問返自己：你係想要價錢定係要價值？
“Life is not a matter of holding good cards, but of playing a poor hand well.”
Are you ready？
Search